शिवाजीनगर पोलिसांकडून जागतिक अमलीपदार्थ विरोधी दिनानिमित्त जनजागृतीचे विविध उपक्रम
जागतिक अमलीपदार्थ विरोधी जनजागृती दिनानिमित्त शिवाजीनगर पोलीस ठाण्याच्या वतीने विविध शैक्षणिक संस्था आणि परिसरात जनजागृती उपक्रम राबवण्यात आले. या उपक्रमांची माहिती पोलीस निरीक्षक दिलीप पवार यांनी दिली. दत्ताजीराव कदम ए.एस.सी. कॉलेज, इचलकरंजी येथे पार पडलेल्या मुख्य कार्यक्रमात प्राचार्य डॉ.शंकर खाडे अध्यक्षस्थानी होते. प्रमुख वक्ते म्हणून मानसोपचार तज्ज्ञ डॉ. संदेश पाटील आणि आरोग्य सल्लागार सौ.भाग्यश्री देवमोरे यांनी व्यसनाचे शारीरिक व मानसिक दुष्परिणाम तसेच व्यसनमुक्तीसाठी आवश्यक उपाय यावर सखोल मार्गदर्शन केले. पोलीस निरीक्षक पवार यांनी सायबर गुन्हेगारी, सोशल मिडियाचा योग्य वापर व पालकांची भूमिका यावर विद्यार्थ्यांना मार्गदर्शन केले. या कार्यक्रमाला २०० ते २५० विद्यार्थी उपस्थित होते. छत्रपती शाहू महाराज जयंतीनिमित्त जीजस हायस्कूल, इचलकरंजी येथे काढण्यात आलेल्या प्रभातफेरीने परिसरात “व्यसनाचा पाया मोडा, आयुष्य सुखाशी जोडा” अशा घोषवाक्यांचा जयघोष केला. या फेरीत १०० हून अधिक विद्यार्थी, शिक्षक व पोलीस अधिकारी सहभागी झाले होते. तसेच न्यू इंग्लिश स्कूल, चंदूर येथे शालेय विद्यार्थ्यांना व्यसनमुक्तीचे महत्त्व पटवून देण्यात आले. आंबेडकरनगर, कबनूर येथे किशोरवयीन मुलांना शैक्षणिक साहित्याचे वाटप करून व्यसनापासून दूर राहण्याचे आवाहन करण्यात आले.